స్వస్తిక్ న్యూస్, ప్రకాశం :- జిల్లాలో రోడ్డు ప్రమాదాల నివారణ మరియు ట్రాఫిక్ నియంత్రణపై పోలీసులు ప్రత్యేక దృష్టి సారించారు. ముఖ్యంగా మైనర్ డ్రైవింగ్పై ఉక్కుపాదం మోపేందుకు సిద్ధమయ్యారు. 18 ఏళ్లలోపు పిల్లల చేతికి వాహనాలు ఇస్తే సహించేది లేదని, నిబంధనలు ఉల్లంఘించే వారిపై కఠిన చర్యలు తీసుకుంటామని ప్రకాశం జిల్లా ఎస్పీ (SP) తీవ్రస్థాయిలో హెచ్చరించారు.మైనర్లు వాహనాలు నడపడం మోటార్ వాహనాల చట్టం ప్రకారం తీవ్రమైన నేరమని ఆయన స్పష్టం చేశారు. ఒకవేళ ఎవరైనా మైనర్లు వాహనాలు నడుపుతూ పోలీసులకు పట్టుబడితే, ఆ పిల్లల తల్లిదండ్రులతో పాటు, ఆ వాహనాన్ని వారికి ఇచ్చిన యజమానులపై కూడా నేరుగా కేసులు నమోదు చేస్తామని హెచ్చరించారు. చట్టప్రకారం వారికి భారీ జరిమానాలు విధించడంతో పాటు, జైలు శిక్ష కూడా అనుభవించాల్సి వస్తుందని ఆయన తేల్చి చెప్పారు. కాబట్టి, తల్లిదండ్రులు అత్యుత్సాహంతో తమ పిల్లలకు వాహనాలు ఇచ్చి చిక్కుల్లో పడొద్దని సూచించారు.ట్రాఫిక్ నిబంధనలు, డ్రైవింగ్ స్కిల్స్ పై కనీస అవగాహన లేకుండా మైనర్లు రోడ్లపైకి రావడం వల్లే ఎక్కువ సంఖ్యలో రోడ్డు ప్రమాదాలు జరుగుతున్నాయని ఎస్పీ ఆవేదన వ్యక్తం చేశారు. అనుభవలేమి కారణంగా జరిగే ఈ ప్రమాదాల్లో అమాయకుల ప్రాణాలు గాలిలో కలుస్తున్నాయని ఆయన పేర్కొన్నారు.
హెల్మెట్ తప్పనిసరి.. డ్రంక్ అండ్ డ్రైవ్ చేస్తే చర్యలు:-మైనర్ డ్రైవింగ్ నియంత్రణతో పాటు ఇతర ట్రాఫిక్ నిబంధనలపై కూడా ఎస్పీ పలు సూచనలు చేశారు. ద్విచక్ర వాహనాలు నడిపే ప్రతి ఒక్కరూ కచ్చితంగా హెల్మెట్ ధరించాలని ఆదేశించారు. అతివేగంగా వాహనాలు నడపడం, మద్యం సేవించి డ్రైవింగ్ చేయడం (డ్రంక్ అండ్ డ్రైవ్) వంటివి చేస్తే వారిపై కూడా చట్టపరమైన చర్యలు తీసుకుంటామని హెచ్చరించారు. ప్రయాణికుల భద్రత కోసమే పోలీసులు నిబంధనలు అమలు చేస్తున్నారని, ప్రతి ఒక్కరూ ట్రాఫిక్ రూల్స్ పాటిస్తూ పోలీసులకు సహకరించాలని ఎస్పీ కోరారు.
