స్వస్తిక్ న్యూస్, జాతీయం :- దేశంలో ఎల్పీజీ (LPG) గ్యాస్ కొరత లేదని కేంద్ర ప్రభుత్వం స్పష్టం చేసింది. ఇటీవల పశ్చిమాసియా ప్రాంతంలో ఏర్పడిన ఉద్రిక్త పరిస్థితుల నేపథ్యంలో గ్యాస్ సరఫరా తగ్గుతుందనే ప్రచారం సోషల్ మీడియాలో విస్తరించడంతో ప్రజల్లో ఆందోళన నెలకొంది. అయితే అలాంటి భయాందోళనలకు తావులేదని కేంద్రం స్పష్టమైన ప్రకటన చేసింది. ఇటీవలి రోజుల్లో గ్యాస్ కొరత వస్తుందనే వదంతుల కారణంగా దేశంలోని కొన్ని ప్రాంతాల్లో వినియోగదారులు ముందుగానే సిలిండర్లు బుక్ చేసుకోవడం పెరిగింది. దీంతో పలు గ్యాస్ ఏజెన్సీల వద్ద క్యూలు కూడా కనిపించాయి. ఈ పరిస్థితిని దృష్టిలో ఉంచుకుని ప్రభుత్వం స్పందిస్తూ దేశంలో గ్యాస్ నిల్వలు సమృద్ధిగా ఉన్నాయని తెలిపింది.
కేంద్ర ప్రభుత్వ అధికారులు వెల్లడించిన వివరాల ప్రకారం, దేశంలో ఎల్పీజీ ఉత్పత్తిని పెంచేందుకు ఇప్పటికే చర్యలు తీసుకున్నారు. రిఫైనరీలలో ఉత్పత్తి సామర్థ్యాన్ని పెంచడం వల్ల గ్యాస్ ఉత్పత్తి సుమారు 30 శాతం వరకు పెరిగిందని తెలిపారు. ఈ చర్యలతో సాధారణ వినియోగదారులకు గ్యాస్ సరఫరాలో ఎలాంటి అంతరాయం ఉండదని ప్రభుత్వం భరోసా ఇచ్చింది.అదేవిధంగా దేశవ్యాప్తంగా గ్యాస్ సరఫరా వ్యవస్థను మరింత బలోపేతం చేయడానికి కూడా కేంద్రం చర్యలు తీసుకుంటోంది. గ్యాస్ నిల్వలు, సరఫరా పరిస్థితులను ప్రభుత్వం నిరంతరం పర్యవేక్షిస్తోందని అధికారులు వెల్లడించారు.ప్రజలు వదంతులను నమ్మకుండా, అవసరమైనప్పుడు మాత్రమే గ్యాస్ సిలిండర్లు బుక్ చేసుకోవాలని కేంద్ర ప్రభుత్వం సూచించింది. అనవసరంగా భయపడాల్సిన అవసరం లేదని, దేశంలో గ్యాస్ సరఫరా సక్రమంగా కొనసాగుతుందని ప్రభుత్వం స్పష్టం చేసింది.
